લહેરિયું - ચિરાગ પટેલ

લહેરિયું - ચિરાગ પટેલ Jan 21, 2000

મન ભરીને ઝૂમી ઉઠ્યું છે અખિલ વિશ્વ આ;
ઉજવે છે પ્રસંગ મિલનનો એવો અનેરો ઉત્સવ.

સમગ્ર પૃથ્વી તણો દેહ ધારણ કર્યો છે શક્તિએ;
લીલુડી ધરણી સજી ઊઠી છે, ભરી વનરાજી છે.

ઉત્તુંગ શિખરો પયોધર-સા ઉત્કંઠિત થયા બધાં;
ખળખળ વહેતી ધારાઓ, છે હર્ષાશ્રુ અસ્ખલિત.

નાની વાદલડીઓ ઊડી રહી છે સમીર સાથે;
જાણે લહેરાય છે લહેરિયું, પ્રેમ રંગની સામીપ્યે.

અંતરમાં ધગધગી રહ્યો છે અનોખો અગન;
ધબકાવી રહ્યો છે, આ જીવન એને આભારી.

સોળે શણગાર સજી, વધાવે સૃષ્ટિ ફૂલેકાંને;
થયું છે શિવનું શક્તિથી મિલન, પ્રેમાદ્ર.

રચાય છે બ્રહ્માંડીય લય, ધબકે છે નવજીવન;
સૃષ્ટિનું અંતિમ સત્ય, જન્માવે ઇશ્વરીય ઊર્જા.